अमरावतीचे ज्येष्ठ समाजसेवक शंकरबाबा पापळकर यांची मूकबधीर मानसकन्या
मंगल आणि रावेर येथील देविदास जैन यांचे मूकबधिर चिरंजीव योगेश यांचा मंगल विवाह
सोहळा जळगाव येथे दि. ३० एप्रिल २०१७ ला अत्यंत उत्साहात पार पडला. या राष्ट्रीय
मंगल विवाह सोहळ्याचे आयोजक रोटरी क्लब ऑफ जळगाव वेस्ट होते. हा अनोखा विवाह सोहळा
जळगावच्या संपूर्ण रोटरी परिवाराने आपल्या घरचे कार्य म्हणून उत्साहाने साजरा
केला. या विवाह सोहळ्याचा प्रकल्प प्रमुख म्हणून गेले महिनाभर मी काम करीत होतो.
माझी भूमिका एक प्रकारे शंकरबाबा यांची १९ वी कन्या चि. सौ. कां. मंगला हिच्या
पालकाचीच होती. त्यामुळे प्रत्येक काम व जबाबदारी वधुचा पिता म्हणूनच मी पार
पाडली. हा विवाह सोहळा झाल्यानंतर मला एक दैवी अनुभव प्राप्त झाल्यासारखे वाटते आहे.
